Gujatrat Online


Gujarati Poems

દિલદાર ને સલામ

-નર્મદ

દિલદાર ને સલામ

સલામ રે દિલદાર, યારની ક્બૂલ કરજે;
રાખીશ મા દરકાર, યાર સમજી ઉર ધરજે.

ઘણા ઘણા લઈ ઘાવ, તાવથી ખૂબ તવાયાં;
નહિ ભોગ પર ભાવ, નાવમાં નીર ભરાયાં.

સરખેસરખી જોડ, કોડના બંને માર્યાં;
છૂટી પડી ગઇ સોડ, હોડમાં બંને હાર્યા.

સખી પરસ્પર બોજ, રોજ સંગાતે રમતાં;
ગયો ખાલી થઈ હોજ, મોજ શી શી રે જમતાં!

એક અંગીનાં અંગ, નંગ કુંદન બન્યો છે;
છાજ્યો નહિ રે સંગ, રંગમાં ભંગ થયો છે.

ઝૂરે તું કહાં પડી દૂર, ઝૂરતો હું અહીં રોજે;
ઊતરી ગયાં છે નૂર, ઉર ફાટે છે યોજે.

પરસ્પરે છે પ્રીત, રીત રાખી છે સારી;
ખરેખરાં દુખી નિત, ચિતમાં ચિંતા ભારી.

મળવાની શી વાત, રાતની રાહ બહુ પાજી;
ખાઇ ઠોકર લાત, જાત રિબાયે ઝાઝી.

(નર્મદના કાવ્યોમાંથી)


We hope you enjoy this section.
For suggestions/ comments contact us!